Mwanamke
aliyetambulika kwa jina la Silvia Chapa (30), mkazi wa Meresini mjini
mdogo wa Himo wilayani hapa,mkoani Kilimanjaro ameuawa na mtu
anayeaminika kuwa mumewe kwa kuchinjwa mithili ya kuku hadi kufa na
kisha mumewe kunywa sumu kwa lengo la kujiua.
Kamanda wa Polisi mkoani hapa Robart
Boaz amethibitisha kutokea kwa tukio hilo na kusema, limetokea usiku wa
kuamkia Novemba 22,mwaka huu ambapo mwili wa mwanamke huyo uligundulika
majira ya mchana ukiwa umefungiwa ndani ya nyumba.
Kamanda amemtaja mwanaume aliyefanya
mauaji hayo kuwa ni Michael Alfonce (28) ambaye baada ya kufanya mauaji
hayo alikunywa sumu inayoaminika kuwa ni ya panya, kisha kufunga mlango
na yeye kutoka nje ya nyumba na kulala chini.
“Majirani
ndiyo waliomwona Alfonce akiwa amelala chini wakampigia simu tajiri yake
ambaye alifika na kumkimbiza hospitali lakini akamuuliza alikoweka
ufunguo wa nyumba alipomuagizia alirudi nyumbani na kufungua mlango na
kukutana na mwili wa mwanamke huyo,”alisema Kamanda.
Kamanda huyo alisema, mwanaume huyo
anauza duka la Godfrey Machange ambaye alifungua nyumba yake na kukuta
damu imetapakaa ndani ya nyumba huku mwili wa mwanamke huyo ukiwa chini.
Mwanaume huyo inadaiwa alifanya mauaji hayo akiwa na lengo la yeye
kujiua pia lakini hakufanikiwa kwa kuwa amewahiwa na kukimbizwa
hospitalini ambako amelazwa katika Hospitali ya Rufaa ya KCMC mjini
Moshi na kwamba hadi sasa chanzo cha mauaji hayo hakijafahamika.
Mmoja wa majirani aliyetambulika kwa
jina moja la Massawe alisema, wawili hao walikua na ugomvi wiki
iliyopita lakini alirudi siku ya Jumanne baada ya kikao cha usuluhishi
na kwamba wanashangaa kuona baada ya siku moja mwanaume huyo ameamua
kumchinja mkewe mithili ya kuku na yeye kutaka kujiua.
Alisema
katika familia hiyo wamebarikiwa kuwa na mtoto mmoja ambaye bado ni
mdogo na kwamba wakati wa mauji hayo mtoto huyo hakuwapo kwa kuwa
walimwacha kwa bibi yake.
